ಬೆಂಗಳೂರಿನ ಆಡಳಿತ ಮಂಡಳಿಗೇ ಸೈಬರ್ ಕಂಟಕ: ಐಎಎಸ್ ಅಧಿಕಾರಿಗಳ ಹೆಸರಲ್ಲೇ ಅಂತರಾಷ್ಟ್ರೀಯ ವಂಚಕರ 'ಡಿಜಿಟಲ್ ಶಿಕಾರಿ'..!

ಜಿಬಿಎ ಬಾಸ್‌ಗಳ ಫೋಟೋ ಬಳಸಿ ಹಣಕ್ಕಾಗಿ ಗಾಳ: ಇಂಡೋನೇಷ್ಯಾ ನಂಬರ್‌ಗಳಿಂದ ಹರಿಯುತ್ತಿದೆ ಗಾಬರಿ ಹುಟ್ಟಿಸುವ ಮೆಸೇಜ್‌ಗಳು - ಇಡೀ ರಾಜ್ಯ ಸರ್ಕಾರಿ ವಲಯದಲ್ಲೇ ತಲ್ಲಣ!

ಬೆಂಗಳೂರು: ರಾಜ್ಯ ರಾಜಧಾನಿಯ ನೂತನ ಆಡಳಿತ ಶಕ್ತಿ 'ಗ್ರೇಟರ್ ಬೆಂಗಳೂರು ಪ್ರಾಧಿಕಾರ'ದ (GBA) ಉನ್ನತ ಅಧಿಕಾರಿಗಳೇ ಈಗ ಸೈಬರ್ ಮಾಫಿಯಾದ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ! ಸಾಮಾನ್ಯ ನಾಗರಿಕರನ್ನು ವಂಚಿಸುತ್ತಿದ್ದ ಕಿರಾತಕರು ಈಗ ನೇರವಾಗಿ ಸಮಾಜದ ಉನ್ನತ ಸ್ತರದ ಐಎಎಸ್ ಅಧಿಕಾರಿಗಳ ಹೆಸರನ್ನೇ ಬಂಡವಾಳ ಮಾಡಿಕೊಂಡು ದಗಾಕೋರತನಕ್ಕೆ ಇಳಿದಿರುವುದು ಇಡೀ ಬೆಂಗಳೂರನ್ನು ಬೆಚ್ಚಿಬೀಳಿಸಿದೆ. ಹಗಲು-ರಾತ್ರಿ ಎನ್ನದೆ ನಗರದ ಅಭಿವೃದ್ಧಿಗೆ ಶ್ರಮಿಸುವ ಅಧಿಕಾರಿಗಳ ಹೆಸರಿನಲ್ಲಿ 'ಹಣದ ಬೇಟೆ' ಆರಂಭವಾಗಿರುವುದು ಆಡಳಿತ ಯಂತ್ರದಲ್ಲಿ ಕಂಪನ ಸೃಷ್ಟಿಸಿದೆ.

​ನಕಲಿ ಡಿಪಿಗಳ ಹಿಂದೆ ಅಡಗಿದೆ ಮೃತ್ಯುಜಾಲ!

​ವಂಚಕರು ಅತ್ಯಂತ ಚಾಣಾಕ್ಷತನದಿಂದ ಜಿಬಿಎ ಮುಖ್ಯ ಆಯುಕ್ತ ಮಹೇಶ್ವರ್ ರಾವ್ ಸೇರಿದಂತೆ, ವಿವಿಧ ವಲಯಗಳ ಆಯುಕ್ತರಾದ ಡಿ.ಎಸ್. ರಮೇಶ್, ಪೊಮ್ಮಲ ಸುನಿಲ್ ಕುಮಾರ್, ಕೆ.ಎನ್. ರಮೇಶ್ ಮತ್ತು ರಾಜೇಂದ್ರ ಚೋಳನ್ ಅವರ ಅಧಿಕೃತ ಫೋಟೋಗಳನ್ನು ಕದ್ದು ತಮ್ಮ ವಾಟ್ಸಾಪ್ ಡಿಪಿಗಳನ್ನಾಗಿ ಬಳಸಿಕೊಳ್ಳುತ್ತಿದ್ದಾರೆ. ಕೆಳಹಂತದ ಸಿಬ್ಬಂದಿ ಅಥವಾ ಸಾರ್ವಜನಿಕರು ಮೊಬೈಲ್ ಸ್ಕ್ರೀನ್ ಮೇಲೆ ಸಾಹೇಬರ ಮುಖ ನೋಡುತ್ತಿದ್ದಂತೆಯೇ ಅದು ನಿಜವಾದ ಸಂದೇಶವೆಂದು ನಂಬಿ ಬಲೆಗೆ ಬೀಳುತ್ತಿದ್ದಾರೆ.

​ಅಂತರಾಷ್ಟ್ರೀಯ ನಂಬರ್‌ಗಳ ಸೈಬರ್ ಅಟ್ಯಾಕ್!

​ಈ ಜಾಲದ ಹಿಂದೆ ಕೇವಲ ಸ್ಥಳೀಯ ಕಳ್ಳರಿಲ್ಲ, ಬದಲಾಗಿ ಅಂತರಾಷ್ಟ್ರೀಯ ಸೈಬರ್ ಕ್ರಿಮಿನಲ್‌ಗಳ ಕೈವಾಡವಿರುವುದು ಈಗ ದೃಢಪಟ್ಟಿದೆ. ಭಾರತೀಯ ಮೂಲದ +91 7631678095 ನಂಬರ್ ಮಾತ್ರವಲ್ಲದೆ, ಇಂಡೋನೇಷ್ಯಾದ ದೇಶದ ಕೋಡ್ ಹೊಂದಿರುವ +62 815580651, +62 85124911356, +62 81913935100 ನಂತಹ ಸರಣಿ ಸಂಖ್ಯೆಗಳಿಂದ ಸಂದೇಶಗಳು ರವಾನೆಯಾಗುತ್ತಿವೆ. ಈ ವಿದೇಶಿ ನಂಬರ್‌ಗಳ ಮೂಲಕ ವಂಚನೆ ಎಸಗುತ್ತಿರುವುದು ತನಿಖಾ ಸಂಸ್ಥೆಗಳಿಗೂ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.

​ಸಂದೇಶಗಳಲ್ಲಿದೆ ಹಣದ ಹಪಾಹಪಿ!

​"ತುರ್ತು ಹಣಕಾಸಿನ ನೆರವು ಬೇಕಿದೆ", "ನಾನು ಮೀಟಿಂಗ್‌ನಲ್ಲಿದ್ದೇನೆ, ಕೂಡಲೇ ಈ ಅಕೌಂಟ್‌ಗೆ ಹಣ ವರ್ಗಾಯಿಸಿ", "ತುರ್ತು ಪರಿಸ್ಥಿತಿ ಇದೆ" ಎಂಬಂತಹ ಭಾವನಾತ್ಮಕ ಮತ್ತು ಆಜ್ಞಾ ಸ್ವರೂಪದ ಸಂದೇಶಗಳನ್ನು ಕಳುಹಿಸಲಾಗುತ್ತಿದೆ. ಹಿರಿಯ ಅಧಿಕಾರಿಗಳೇ ಕೇಳುತ್ತಿದ್ದಾರೆ ಎಂದು ಭಾವಿಸಿ ಯಾರಾದರೂ ಹಣ ವರ್ಗಾಯಿಸಿದರೆ, ಆ ಹಣ ಕ್ಷಣಾರ್ಧದಲ್ಲಿ ಹತ್ತಾರು ಅಕೌಂಟ್‌ಗಳ ಮೂಲಕ ಮಾಯವಾಗುತ್ತಿದೆ. ಮಹದೇವಪುರ ವಿಭಾಗದ ಜಂಟಿ ಆಯುಕ್ತೆ ದಾಕ್ಷಾಯಿಣಿ ಕೆ ಸೇರಿದಂತೆ ಹಲವು ಅಧಿಕಾರಿಗಳಿಗೆ ಇಂತಹ ನಕಲಿ ಸಂದೇಶಗಳು ಬಂದಿರುವುದು ವ್ಯವಸ್ಥಿತ ಸಂಚಿಗೆ ಸಾಕ್ಷಿಯಾಗಿದೆ.

​ಬೆನ್ನುಬಿದ್ದ ಸೈಬರ್ ಪೊಲೀಸರು - ಎಫ್‌ಐಆರ್ ಸರಣಿ!

​ಈ ಸೈಬರ್ ದಾಳಿಯ ತೀವ್ರತೆ ಎಷ್ಟಿದೆಯೆಂದರೆ, ಕಳೆದ ಹತ್ತು ದಿನಗಳಲ್ಲಿ ಸರಣಿ ದೂರುಗಳು ದಾಖಲಾಗಿವೆ. ಜಿಬಿಎ ಮುಖ್ಯ ಆಯುಕ್ತರು ಏಪ್ರಿಲ್ 15 ಮತ್ತು 17 ರಂದು ದೂರು ನೀಡಿದರೆ, ಉಳಿದ ಆಯುಕ್ತರುಗಳು ಏಪ್ರಿಲ್ 22 ಮತ್ತು 23 ರಂದು ಸೈಬರ್ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾರೆ. ಇಂಜಿನಿಯರಿಂಗ್ ವಿದ್ಯಾರ್ಥಿಯೊಬ್ಬ 7 ಕೋಟಿ ಕಳೆದುಕೊಂಡ ಪ್ರಕರಣದ ಬೆನ್ನಲ್ಲೇ ಈಗ ಸರ್ಕಾರದ ಉನ್ನತ ಹುದ್ದೆಗಳಿಗೇ ಕಂಟಕ ಎದುರಾಗಿರುವುದು ಸೈಬರ್ ಲೋಕದ ಭೀಕರತೆಯನ್ನು ಅನಾವರಣಗೊಳಿಸಿದೆ.

​ಸಾರ್ವಜನಿಕರಿಗೆ ಕಟ್ಟುನಿಟ್ಟಿನ ಎಚ್ಚರಿಕೆ: ಯಾವುದೇ ಕಾರಣಕ್ಕೂ ಅಪರಿಚಿತ ನಂಬರ್‌ಗಳಿಂದ ಬರುವ ವಾಟ್ಸಾಪ್ ಸಂದೇಶಗಳಿಗೆ ಪ್ರತಿಕ್ರಿಯಿಸಬೇಡಿ. ನಿಮ್ಮ ಮೊಬೈಲ್ ಪರದೆಯ ಮೇಲೆ ಅಧಿಕಾರಿಗಳ ಫೋಟೋ ಕಂಡರೂ, ಅವರು ಹಣ ಕೇಳುತ್ತಿದ್ದಾರೆ ಎಂದರೆ ಅದು ನೂರಕ್ಕೆ ನೂರು ವಂಚನೆ ಎಂಬುದು ನೆನಪಿರಲಿ. ಅನುಮಾನ ಬಂದ ತಕ್ಷಣ 1533 ಹೆಲ್ಪ್‌ಲೈನ್‌ಗೆ ಕರೆ ಮಾಡಿ. ನಿಮ್ಮ ಒಂದು ಸಣ್ಣ ಮೈಮರೆವು ನಿಮ್ಮ ಬ್ಯಾಂಕ್ ಬ್ಯಾಲೆನ್ಸ್ ಅನ್ನು ಶೂನ್ಯ ಮಾಡಬಹುದು, ಎಚ್ಚರ! ಎಚ್ಚರ!